KORONADAL CITY – Nagapanawagan sang bulig sa administrasyong Marcos ang 13 ka mga OFW’s nga nadulaan sang trabaho sa pungsod Sri Lanka.
Sa eksklusibo nga interview sang Bombo Radyo Koronadal kay Ms. Joan Daniel-Taruc, taga-Surigao kag kasamtangan nga yara sa Colombo, Sri Lanka, tuman ka budlay ang ila nga sitwasyon didto upod ang iban nga mga Pinoy nga nadulaan sang trabaho.
Suno kay Joan, nagapadayon sa karon ang protesta apisar nga nagresign na sa pwesto si Sri Lankan President Gotabaya Rajapaksa bangud sa naguwa nga balita nga paryente lamang sini sa gihapon ang magabulos sa iya.
Sa pagkamatuod, wala nila matapos ang ila kontrata bangud ginpwersa sila nga mag-resign tuga sang kinagamo kag indi na sila masarangan sang ila employer nga swelduhan.
Sa karon, ginabudlayan sila nga magpangita sang pagkaon kag panginahanglanon.
Wala naman sila makapadala sang kwarta halin sang nagliligad nga bulan sa ila pamilya bangud sa mahal nga balayran kag kabudlay sang sitwasyon.
Nagreklamo man sila sa Philippine Consulate bangud indi maathag kun sa diin nila makuha ang bulig ukon ayuda sang gobyerno.
Maayo na lamang suno pa nga naghulag ang ila nga agency kag naka-line up na sila nga magpauli sa pungsod.
Apang, ang kabalaka naman nila sa pag-abot sa Pilipinas wala sila sang trabaho.
Kaangot sini, nagalaum si Joan nga mabatian man ni Pangulong Ferdinand Marcos, Jr. ang ila panawagan.
Nahibaluan nga kaupod ni Joan ang utod sini nga si Baby Rose Taruc ka gang 12 pa ka mga Pinay nga yara sa accommodation sa Negombo, Sri Lanka.
