Mahimo gihapon pasakaan sang criminal case ang bise presidente bisan pa mag-resign ukon magbiya ini sa iya pwesto bilang bise presidente.
Ini ang ginpahayag ni Ret. Judge Lorenzo Balo, Provincial Legal Adviser sang Sultan Kudarat, sa interview sang Bombo Radyo Koronadal.
Suno sa anay hukom, may nagkalain-lain nga school of thought nga ginalantaw sa nagapadayon nga kaso batok sa bise presidente, ilabi na sa epekto sang iya posisyon sa impeachment proceedings.
Ginpahayag ni Balo nga ang panguna nga tumong sang impeachment trial amo ang pagpahalin sa isa ka opisyal sa pwesto kag pag-disqualify sa iya sa pag-uyat sang bisan ano nga posisyon sa gobyerno.
Apang, suno sa iya, ang pag-resign ukon pagbiya sa pwesto indi kinahanglan magpugong sa posible nga pagpasaka sang separado nga criminal case, kun may basehan para sini.
Ginpaklaro ni Ret. Judge Balo nga ang impeachment kag criminal proceedings amo ang duha ka separado nga proseso, gani ang mga isyu nga ginatalakay sa impeachment trial mahimo pa nga mangin basehan sang iban nga legal nga aksyon, depende sa mga ebidensya kag applicable nga mga layi.
