Ginpakita liwat sang isa ka 61-anyos nga fitness enthusiast nga indi sablag ang edad sa pagkab-ot sang bag-o nga rekord matapos niya mabali ang iya kaugalingon nga world record sa abdominal plank sa Utah, United States.
Nakahimo si DonnaJean Wilde nga mapabilin ang plank position sa sulod sang lima ka oras sa ginpatigayon nga Huntsman World Senior Games, isa ka palaro nga nagakilala sa mga kadalag-an sa sports sang mga atleta nga nagaedad sang 50 anyos pataas.
Ginhimo ni Wilde ang iya pagsulay nga makarekord bilang bahin sang opening ceremonies sang nasambit nga palaro. Paagi sa iya bag-o nga kadalag-an, nalab-ot kag nalabwan niya ang iya kaugalingon nga Guinness World Record nga naangkon niya sang 2024, sang nakapabilin siya sa plank position sa sulod sang apat ka oras, 30 minutos kag 11 segundos.
Suno kay Kyle Case, chief executive officer sang Huntsman World Senior Games, ginapakita sang kadalag-an ni Wilde ang matuod nga katuyuan sang palaro—nga indi kinahanglan untatan ang mga butang nga ginakalipay samtang nagadugang ang edad.
Ginpakita sang kadalag-an ni Wilde nga paagi sa dedikasyon kag padayon nga pagpanikasog, mahimo gihapon nga magtakda sang bag-o nga mga tulumuron kag makab-ot ang talalupangdon nga mga kadalag-an sa bisan ano nga bahin sang kabuhi.
