Ginpahanumdoman ni Vice President Sara Duterte ang publiko parte sa husto nga pagsunod sa mga layi sang trapiko agud malikawan ang bisan ano nga klase sang aksidente sa dalanon.
Ginhimo sang Bise ang panawagan matapos ang pagtaas sang kaso sang mga aksidente sa dalanon nga gina-imbolbar sang mga motor vehicle.
Ang ini nga mensahe ang kabahin sang Land Transportation Safety Month, kun sa diin ginpabaskog sang Bise nga dapat magbinuligay ang mga motorista, pribado nga sektor, kag gobyerno para masiguro ang kaluwasan sang tanan sa dalanon.
Suno kay VP Sara, ang road safety indi lang obra sang mga traffic enforcers.
Nangin panawagan man niya sa mga pribado nga sektor nga siguruhon nga maayo ang kondisyon sang ila mga drayber kag dapat makaagi sila sa husto nga training kag seminar.
Base sa datos, nagaabot sa 11,000 ka mga Pilipino ang napatay sang tuig 2021 tungod sang mga aksidente sa dalanon.
Kadam-an sa mga ini amo ang mga pedestrians, motorists, bicyclists, kag mga tricycle nga kasagaran naga-edad 15 tubtob 19 anyos.
