Naserbi na sang Police Regional Office 11 ang mando nga nagabawi sang lisensiya sang mga armas ni Sen. Ronald Dela Rosa.
Ginhatag ang nasambit nga dokumento kay Atty. Vicente Adrian Pajaro, ang legal nga representante ni Sen. Dela Rosa.
Suno sa Philippine National Police-Regional Civil Security Unit 11, ginpangunahan sang Davao City Police Office ang pagsilbi sang Order of Revocation para sa License to Own and Possess Firearms (LTOPF) kag Firearms Registrations (FR) sang nasambit nga senador.
Suno kay Davao Region Director PBGen. Leon Victor Z. Rosete, nag-una sang koordinasyon ang regional office sa lokal nga pulis agud masigurado ang hapsay nga pagserbi sang revocation order.
Maayo man suno sa iya ang pagbaton ni Atty. Pajaro sa mando kag nagpasalig nga makig-istorya siya sa iya kliyente bahin sini.
Nagpahayag man ang abogado nga magabalik ang koordinasyon sa mga law enforcement agencies para sa mga armas sang anay Philippine National Police chief.
Sa karon, wala pa sang impormasyon kun nabalik na sa PNP ang mga armas sang senador nga ginabulubanta nga yara sa masobra 100, nga nagalakip sang shotgun, rifle, handgun, kag iban pa.
