Pormal nga nagpahibalo ang Venezuela sa United Nations sang ila desisyon nga magguwa na sa International Criminal Court (ICC), nga ginatawag nila nga may “geographical bias” batok sa mga pungsod sa Global South, labi na sa Africa kag Latin America.
Suno kay Foreign Minister Felix Plasencia, indi na mabag-o ang amo nga desisyon kag kabahin ini sang ila pagkontra sa imbestigasyon sang ICC may kaangtanan sa ginapatihan nga crimes againts humanity nga ginhimo sang mga opisyal kag militar sang Venezuela halin pa sang 2017.
Ginpahayag man ni Acting President Delcy Rodriguez nga ang ICC nagin politikal nga instrumento batok sa Venezuela, gani wala na sila nagasalig sa sini nga institusyon.
Madumduman nga sang Disyembre 2025, ginbawi sang National Assembly sang Venezuela ang balaod nga nagratipikar sa Rome Statute, nga nagbukas sang dalan para sa pormal nga pagguwa sang pungsod sa ICC.
Kasunod sini, ginkakas man sang mga miyembro sang ICC si Prosecutor Karim Khan matapos maakusaran sang sexual misconduct, bisan ginpanginwala niya ini.
Nagluntad ang pagguwa sang Venezuela sa ICC sa tunga sang transisyon sa gobyerno matapos mapahalin sa poder si Nicolas Maduro kag sa idalom sang pagpanguna ni Acting President Delcy Rodriguez.
