Ginatinguhaan sang gobyerno sang Pilipinas nga mapanubo ang 12.5 porsyento nga taripa sang Estados Unidos sa mga produkto nga ginapaeksport sang pungsod sa natalana nga pagsinapol nanday Presidente Ferdinand Marcos Jr. kag US President Donald Trump sa Miyerkules, Nobyembre 18.
Suno kay Trade Secretary Cristina Roque, isa ini sa mga panguna nga topiko nga pagahambalan sang duha ka lider agud mapauswag ang pag-eksport kag mapabakod ang pag-ilinay sang mga produkto sang Pilipinas sa pangkalibutanon nga merkado.
Ginpahayag man ni Roque nga ginpahibalo na sang Pilipinas sa Estados Unidos ang Joint Administrative Order (JAO) nga ginhimo agud sabton ang mga kabalaka sang Washington may kaangtanan sa pagsulod sang mga produkto nga ginhimo paagi sa pinilit nga pagpangabudlay.
Ginalauman sang kalihim nga mangin kabahin ini sang paghinun-anon nahanungod sa posible nga pagbag-o sa nagapadayon nga taripa.
Madumduman nga ginpatuman sang Estados Unidos ang nasambit nga taripa bangud sa alegasyon nga kulang ang tikang sang Pilipinas kontra sa mga produkto nga may kaangtanan sa pinilit nga pagpangabudlay.
Ginalauman nga magaabot si Trump sa Manila sa Martes, Nobyembre 17, para sa ASEAN Summit kag sa iya bilateral nga pagsinapol kay Marcos.













