-- ADVERTISEMENT --

Ginapanawagan ang mga estudyante nga gamiton sing responsable ang Artificial Intelligence (AI) sa ila pagtuon kag indi magsalig diri bilang pagbulos sa kaugalingon nga panghunahuna, pag-analisar kag paghangop.

Sa interview sang Bombo Radyo Koronadal ginpahayag ni Novy Shamae Aligonero, local news presenter-English sang Radio Broad Team sang KNCHS, nga mahimo mangin mapuslanon ang AI bilang dugang nga instrumento sa pagpaathag sang mga leksyon kag pagpalapad sang ihibalo, apang indi dapat direkta nga kuhaon diri ang mga sabat sa mga palamangkutanon nga wala ginahangop ang sulod sini ukon konteksto.

Gindugang niya nga importante nga mapadayon sang mga kabataan ang ila abilidad sa pagpanalawsaw, paghimo sang kaugalingon nga mga artikulo kag balita, kag pag-usisa sang mga impormasyon agud mapauswag ang ila kritikal nga panghunahuna.

Ginpahanumdom man ni Aligonero ang importansya sang pag-fact-check antes magpati ukon magpakalat sang impormasyon, ilabi na sa social media, agud malikawan ang paglapta sang fake news.

Ginpanugyan niya nga maggamit sang masaligan kag beripikado nga mga website bilang basihan sa pag-usisa sang kamatuoran sang mga impormasyon.

Ginhatagan nya pagtamod nga dapat mangin giya lamang ang AI sa pagtuon, samtang ang kaugalingon nga panghunahuna kag abilidad sang estudyante amo gihapon ang dapat mangin pundasyon sang iya pagkat-on.