Arestado sang Polomolok MPS ang tatlo ka suspek bangud sa ilegal nga bulang sang mga manok sa banwa sang Polomolok kahapon nga adlaw sang Sabado, Nobyembre 22,2025.
Base sa Polomolok MPS, nakabaton sila sang tawag sa cellphone halin sa sa isa ka concerned citizen nga nagasiling nga may ginahimo nga ilegal nga bulangan sa Prk. 2, Brgy. Palkan, Polomolok, South Cotabato. Pagbaton sang nasambit nga report, gilayon nga nagresponde ang intelligence operatives nga ginapangunahan ni PCPT ROLANDO C. RAMOS JR, Admin Officer, padulong sa nasambit nga lugar.
Ginkilala ang mga suspek nga sanday alyas “Zalde”, 67 anyos, kasado, alyas “Angelo”, 47 anyos, single, kag alyas “Ivan”, 29 anyos, single, lunsay mga taga Polomolok, South Cotabato.
Narekober sa tatlo ang mga ebidensya nga amo ang masunod: Isa (1) ka buhi nga manok pangbulang; isa (1) ka patay nga manok pangbulang; duha (2) ka bilog sang tari nga may scabbard; kag pusta nga kwarta nga nagabalor sang isa ka libo pesos (Php1,000.00).
Ginpahibalo ang mga nadakpan nga suspek sang ila nga paglapas kag ginpaathag sa ila ang ila konstitusyonal nga kinamatarung. Pagkatapos sini, ginpakadto sila sa Polomolok MPS upod ang narekober nga mga ebidensya para sa nagakaigo nga pagdumala kag disposisyon sang kaso. Ang kaso para sa paglapas sang PD 1602 ang ginahimo para isaka paagi sa inquest proceeding batok sa mga nadakpan nga suspek.
