Ginpanginwala ni South Cotabato Governor Reynaldo Tamayo Jr. ang mga huring-huring nga may ginapreparar nga Constitutional Assembly (Con-Ass) nga nagatuyo nga palawigon ang termino sang mga nakapungko nga pulitiko, lakip na ang presidente kag mga kongresista.
Suno kay Gov. Tamayo, wala sang nagaluto nga Con-Ass kag klaro nga indi ini kabahin sang mga ginatutukan ukon prayoridad sang kasamtangan nga administrasyon.
Ginpabutyag niya nga madamo sa mga nagalapta nga impormasyon sa social media ang indi dapat dayon patihan, bangud may mga post nga wala sang husto nga basehan kag kredibilidad.
Gindugang pa sang gobernador nga importante nga magpabilin ang publiko nga maalamon kag mahalungon sa pag-verify sang impormasyon antes maghatag sang konklusyon, ilabi na sa mga sensitibo nga isyu nga may kaangtanan sa politika kag gobyerno.
Sa pihak sini, nagpanawagan si Gov. Tamayo sa publiko nga likawan ang pagbinaisanay kag mas pabakuron ang paghiusa sa komunidad.
Ginhingyo man niya ang mga pumuluyo nga padayon nga suportaran ang mga opisyal nga naeleher kag nagaserbe sa ila katungdanan sa gobyerno.
