Nagapadayon ang pagpatuman sang mga regulasyon sa trapiko sa syudad sang Koronadal kasunod sang padayon nga kampanya para sa road safety kag pagproterher sa mga pasahero.
Sa interview sang Bombo Radyo Koronadal, ginpahayag ni City Traffic Head Joy Placer nga mas ginapabaskog sang ila opisina ang pagmonitor sa mga salakyan kag drivers agud masiguro nga nasunod ang mga ordinansa kag mga patakaran sa transportasyon.
Suno kay Placer, may mga memorandum gikan sa national agencies partikular sa Department of Transportation (DOTr) kag sa Land Transportation Office (LTO) nga nagaimplementar sang mas istrikto nga polisiya may kaangtanan sa violations kag renewal sang driver’s licenses.
Ginpabutyag man niya nga importante nga mabayran kag maaksyonan sang mga drivers ang ila mga penalidad ukon suspensyon bangud mahimo ini makaapekto sa ila transaksyon sa LTO, lakip na ang pag-renew sang driver’s license. Ginapahug-tan man sang City Traffic Management Division ang seguridad sang publiko, ilabi na sa mga commuters kag tricycle passengers.
Gani, nagpanawagan si Placer sang mas hugot nga bulig kag kooperasyon gikan sa mga organisado nga grupo sang tricycle drivers pinaagi sa pag-upod sang disiplina, penalties, kag suspensions sa ila internal rules ukon bylaws para mapaluntad ang maayo kag responsable nga serbisyo.
Dugang pa diri, padayon man ang training kag orientation para sa mga drivers sa siyudad agud mapaayo ang pagtratar sa mga pasahero kag mapalig-on ang maayong imahe sang Koronadal, ilabi na nga “first impression lasts” para sa mga bisita kag commuters nga nagaabot sa siyudad.
Gindayaw man ni Placer ang mga matutom kag matinlo nga drivers nga nagauli sang mga valuable items nga nalipatan sang pasahero, bilang ehemplo sang integridad kag maayo nga serbisyo sa komunidad.
