Nagapabilin sa P15 ang minimum nga pamasahe sa mga tricycle sa syudad sang Koronadal bisan may ginpasaka nga petisyon para sa fare hike ang federation sang mga TODA may kaangtanan sa pagsaka sang presyo sang gatong.
Ini ang nangin pahayag ni Traffic Management Head Joy Placer sang City Traffic Management Division Office sa exclusive interview sang Bombo Radyo Koronadal.
Suno kay Placer, wala pa pormal nga naaprubahan sang lokal nga pamunuan ang petisyon sang federation sang mga TODA para sa pagpasaka sang minimum fare, gani magapabilin sa gihapon sa P15 ang pamasahe sa tanan nga mga tricycle sa syudad.
Ginpahayag man sini nga ginatan-aw pa sang maayo sang mga otoridad ang epekto sang posible nga fare increase sa mga komyuter ilabi na sa tunga sang pagsaka man sang presyo sa pagkaon kag nagapanguna nga baraklon.
Dugang pa ni Placer, nagapati man ang ila talatapan nga kinahanglan timbangon ang interes sang mga driver kag sang publiko antes himuon ang desisyon angot sa petisyon.
Nagpaalinton man si Placer sa tricycle drivers nga indi magpanukot sang plete nga wala sa matrix sang syudad, bangud kasubong sang mga drivers, apektado man sang pagsaka sang presyo sang gatong kag krisis ang mga commuters, gani gin-awhag niya ang publiko nga magintindihanay kag magbilunagay sa tunga sang padayon nga krisis bangud sa kinagamo sa Middle East.
