KORONADAL CITY – Nagsungka na sa banwa sang Tupi, South Cotabato ang suspek sa pagpamuno-patay sa isa ka welder sa bahin sang Polomolok, South Cotabato.
Ginkilala sang mga otoridad ang suspek nga si Jay-ar Sausa, yara sa legal nga pangedaron kag residente sang Barangay Acmonan, Tupi, South Cotabato.
Suno sa panaysayon sang suspek, nagluntad suno pa ang indi pag-intindihanay nila sang biktima kag aksidente nga nabuno niya ini tubtub sa nautasan ini sang kabuhi.
Madumduman nga wala na kabuhi ang nakit-an nga lawas sang welder sa Field 109A Londres, Barangay Cannery Site, Polomolok, South Cotabato, mga 10 kilometros ang kalayuon halin sa Polomolok Police Station, sang Hunyo 18, 2024.
Nakilala ang 29-anyos nga biktima nga si Rosevelt Ballacar, may ka-live in partner kag residente sang Purok Candelaria, Poblacion, Tupi, South Cotabato.
Una diri, natukiban nga may buno ang biktima kag narekober ang ginamit nga kitchen knife halos 180 metro halin sa iya lawas.
Nahibaluan nga sa pagsungka sang suspek, naghinghinyo pa ini sang pasaylo sa pamilya sang biktima nga iya man suod nga abyan.
