KORONADAL CITY – Kaso nga two counts of murder ang igasang-at sa suspek nga nagpatay sa mag-asawa makaligad ginpangbuno ang mga ini sa bahin sang Prk. Maligaya, Brgy. Magsaysay, Koronadal City.
Ini makaligad maarestar sang mga katapo sang Koronadal PNP ang suspek nga si Paul John Membrado, 19 anyos, laborer, himata sang mga biktima kag residente sang nasambit nga lugar.
Nadakpan si Membrado sa ginpatigayon nga pursuit operation sang mga kapulisan sa bahin sang Prk. Cabaylo, Brgy. San Roque, diri sa siyudad.
Sa eksklusibo nga interbyu sang Bombo Radyo Koronadal kay Police Lt. Col. Reynaldo Sotelo, chief investigator sang Koronadal City PNP, naarestar si Membrado sa ginpatigayon nga follow up operation sang kapulisan kagab-i.
Gin-ako suno pa ni Membrado nga siya ang nagpatay sa mga biktima bangud gin-challenge ini sang iya live-in partner nga magpatay sang tawo antes ini makigbalik sa iya.
Narekober sa suspek ang duha ka kutsilyo nga posible nga gin-usar sa pagbuno sa mga biktima nga sanday Arturo Aquino, 68, isa ka retired military major kag asawa nga si Erlinda, 75, isa ka retired midwife.
Sa interbyu sang Bombo Radyo Koronadal kay Brgy. Magsaysay kapitan Luz Bustillo, ginkakibot kag ginkasubo sini ang nasambit nga panghitabo kag nag-apela sang bulig nga magbuliganay ang tanan agud indi na maliwat ang nasambit nga krimen.
Samtang, nabuyagyag man nga sadto anay nagausar sang droga ang suspek.
