Sa gitna ng pagdiriwang ng kanyang kaarawan, iginiit ng House prosecution panel na ang pinakamahalagang maibibigay kay Vice President Sara Duterte ay ang pagkakataong maipagtanggol ang kanyang sarili sa pamamagitan ng patas at maayos na proseso ng impeachment trial.
Ayon kay Renee Co, spokesperson ng House prosecution team, ginagarantiyahan ng Konstitusyon na mabibigyan ang Bise Presidente ng sapat na pagkakataon upang sagutin ang lahat ng alegasyong isinampa laban sa kanya sa harap ng Senate impeachment court.
Binigyang-diin ni Co na mahalagang magamit ni Sara Duterte ang nalalapit na paglilitis upang direktang tugunan ang mga isyung matagal nang nais marinig ng publiko ang kanyang panig. Aniya, inaasahan ng prosecution panel na sasagutin ng kampo ng Bise Presidente hindi lamang ang mga usaping procedural kundi pati ang mga substansyal na alegasyong nakapaloob sa impeachment complaint.
Nauna nang sinabi ng legal team ni Duterte na haharapin at sasagutin nito ang mga paratang sa tamang forum. Nakatakda ring magsumite ang Bise Presidente ng kanyang opisyal na tugon sa Senate impeachment court pagsapit ng Hunyo 1, alinsunod sa itinakdang deadline ng Senado.
Kabilang sa mga paratang na nakasaad sa articles of impeachment ang umano’y maling paggamit ng confidential funds, hindi maipaliwanag na yaman, bribery, at grave threats laban sa ilang opisyal ng pamahalaan.
Habang nagpapatuloy ang proseso, muling iginiit ng House prosecutors na ang impeachment trial ay magsisilbing pagkakataon para sa magkabilang panig na mailahad ang kanilang ebidensya at argumento sa ilalim ng due process.
