Nagpasalig si State witness kag anay Department of Public Works and Highways (DPWH) Undersecretary Roberto Bernardo nga ibalik ang kabug-usan nga P1 billion sa public treasury.
Ini bilang kabahin sang restitution kabaylo sang iya pagsulod sa Witness Protection Program (WPP) agud magtestigo sa mga anomaliya sa flood control projects.
Masobra sa P500 milyones ang nabalik na sadto ni Bernardo sa gobyerno.
Sa iya testimonya sa bail hearing ni anay Senador Ramon Revilla Jr. kag sang kaupod sini nga akusado sa kaso nga malversation sa atubang sang Sandiganbayan, gin-ako sang anay opisyal sang DPWH ang iya papel sa gina-alegar korapsyon sa mga proyekto, lakip na sa Pandi, Bulacan, kag ginpahayag nga nagahinulsol siya nga nangin kabahin sang sistema.
Nagtestigo man si Bernardo nahanungod sa tatlo ka ginaalegar multi-milyon-dolyar nga cash deliveries kay anay Senador Revilla sang 2024 kag 2025.
Ginsaysay man ni Bernardo nga gin-alegar nagpangayo si Revilla sang 25% nga commitment para sa mga proyekto sa imprastraktura, lakip na ang gin-alegar ghost flood control project sa Pandi, Bulacan.
Suno sa iya, ginhambalan siya sang anay Senador nga makig-angot kay anay DPWH Secretary Manuel Bonoan kag sa nagtaliwan nga anay DPWH USec. Catalina Cabral, nga ilakip ang proyekto sa Pandi, Bulacan sa 2025 General Appropriations Act (GAA).
