Ginpasiguuro sang gobernador sang Probinsya sang South Cotabato nga bastante kag wala nagakulang ang provincial government sang mga kinahanglanon nga bulig para sa mga pamilya nga posible maapektuhan sang padayon nga pag-ulan kag kalamidad nga dala sang Southwest Monsoon ukon Habagat.
Sa interview sang Bombo Radyo Koronadal, ginpahayag ni Governor Reynaldo Tamayo Jr. nga may yara sang igo nga buffer stocks kag pondo ang probinsya para sa disaster response.
Lakip sa ginapreparar ang hygiene kits, kitchenware, kag iban pa nga emergency supplies nga mahimo ipanagtag sa mga pamilya nga maapektuhan kon maglala ang sitwasyon.
Dugang pa sang gobernador, ginadumalahan sing maayo ang paggamit sang calamity fund agud masiguro nga may nagakaigo nga reserba ang probinsya para sa posible nga mas dalagko nga kalamidad sa masunod nga mga adlaw.
Samtang, padayon ang koordinasyon sang provincial government sa mga nagakaigo nga ahensya agud masiguro ang madali nga pagresponde kun may emerhensya.
Sa karon, ginpahayag ni Tamayo nga wala pa sang napagkit nga napatay ukon malala nga pilas may kaangtanan sa epekto sang Habagat.
Apang, ginpasalig niya nga padayon ang pagmonitor sa sitwasyon kag gilayon nga magahatag sang bulig sa mga komunidad nga mahimo maapektuhan.
