Pumanaw ang South Africa international midfielder na si Jayden Adams, na naging bahagi ng tatlong laro ng kanilang koponan sa group stage ng 2026 FIFA World Cup, ayon sa South African sports ministry. Hindi naman ibinahagi ang sanhi ng kanyang pagkamatay.
Si Adams, 25, ay naging starter sa laban ng South Africa kontra Mexico at Czech Republic, at pumasok bilang substitute sa kanilang 1-0 panalo laban sa South Korea na nagbigay sa bansa ng unang pag-abot sa knockout stage ng World Cup. Natalo naman sila sa sumunod na laban kontra Canada.
Isang araw bago ang laban nila kontra Czech Republic, pumanaw ang kanyang lola kaya napalitan siya sa halftime ng naturang laro.
Naglaro si Adams para sa Mamelodi Sundowns sa South Africa at tumulong sa pagkapanalo ng koponan sa African Champions League title noong 2025/26 season.
Nagpaabot din ng pakikiramay si South Africa Sports Minister Gayton McKenzie, gayundin si FIFA President Gianni Infantino na nagbahagi ng kanyang pakikiramay sa pamilya, mga kaibigan, at mga kasamahan ni Adams.
Nagsimula ang football career ni Adams sa youth development program ng Stellenbosch FC bago siya lumipat sa Mamelodi Sundowns noong Enero 2025.
Nag-debut siya sa national team noong 2022 kontra Mozambique at nakapaglaro ng 13 international matches, kung saan nakapagtala siya ng dalawang goal sa mga qualifying match para sa 2026 World Cup.
