Lalong lumalawak ang imbestigasyon ng Senado sa umano’y flood control scandal matapos isama si dating House Speaker at Leyte 1st District Rep. Martin Romualdez sa listahan ng mga inimbitahang dumalo sa pagdinig ng Senate Blue Ribbon Committee.
Ayon kay Sen. Pia Cayetano, chairperson ng komite, itinakda ang susunod na hearing sa Hunyo 4 bilang bahagi ng pagsisikap na busisiin ang mga alegasyon ng iregularidad sa mga proyektong pang-imprastruktura at paggamit ng pondo ng gobyerno.
Kabilang si Romualdez sa 34 na personalidad na pinadalhan ng imbitasyon. Nauna nang itinanggi ng mambabatas ang anumang pagkakasangkot sa mga umano’y anomalya at budget insertions na inuugnay sa kontrobersiya.
Bukod kay Romualdez, inimbitahan din ng komite ang 18 indibidwal na nagpakilalang dating miyembro ng Philippine Marines. Ayon sa kanilang mga pahayag, sila umano ang naghatid ng mga kickback sa ilang opisyal ng pamahalaan kaugnay ng mga proyekto.
Kasama rin sa mga ipatatawag si dating assistant engineer Brice Hernandez, na naunang naglantad ng mga alegasyon laban sa ilang mambabatas tungkol sa umano’y mga iregularidad sa flood control projects.
Sinabi ng komite na layunin ng pagdinig na maberipika ang mga alegasyon, matukoy ang mga posibleng may pananagutan, at matiyak ang wastong paggamit ng pondo para sa mga proyektong inilaan para sa kapakanan ng publiko.
