Naglabaw sa P1 bilyon ang ginapatihan nga kickback nga ginadeliver kay Zaldy Co, may acknowledgment receipt suno sa testigo. May mga acknowledgment receipt (AR) nga nagarekord sang ginapatihan nga pag-deliver sang kickback nga nagalabaw sa P1 bilyon kay anay Ako Bicol party-list Representative Zaldy Co, suno sa pagpamatuod sang testigo sa Sandiganbayan Third Division sang Huwebes.
Sa iya testimonya, ginpahayag ni Wirt Walter Rosales, personal assistant ni anay Public Works engineer Henry Alcantara, nga nakasulat sa mga acknowledgment receipt ang kantidad sang kwarta nga ginadeliver para kay Co.
Suno kay Rosales, ang mga resibo ginabaton sang ginapatihan nga executive assistants ni Co nga sanday John Paul Estrada kag Mark Ticsay, kag mas masami nga si Ticsay ang nagapirma sini.
Dugang pa sang testigo, nagalab-ot sa P300 milyon ang pinakadako nga kantidad nga nakasulat sa isa ka acknowledgment receipt, samtang nagalabaw sa P1 bilyon ang kabug-usan sang kwarta nga iya ginadeliver para kay Co.
Nagtestigo si Rosales sa bail hearing ni anay House Speaker Martin Romualdez, nga nagaatubang sang kaso nga plunder may kaangtanan sa ginapatihan nga kickback halin sa mga infrastructure project nga nagabalor sang P7.44 bilyon. Nahibaluan nga si Co ang anay chairperson sang House appropriations committee sang panahon sang speakership ni Romualdez, kaupod man nga akusado sa amo nga kaso.
