Nagapabilin nga nagaluya ang bili sang piso kontra dolyar matapos magtala liwat ini sang bag-o nga record low nga P63.361 kada dolyar sa pagsira sang kalakalan sang Miyerkules, Oktubre 21, 2026.
Nalab-ot na sini ang mas maluya nga lebel kon ikumpara sa nagligad nga record low nga P62.09 kada dolyar nga natala sang Lunes kag Martes, Oktubre 19 kag 20. Antes ang opisyal nga pagsira sang merkado, nagdangat pa sa P63.373 kada dolyar ang palitanay sang duha ka currency sa intraday trading.
Ini na ang ika-29 nga beses sa sulod sang tuig nga nagrekord ang piso sang bag-o nga pinakamaluya nga bili batok sa dolyar.
Ginapaabot nga mahimo ini magdugang sa gasto sa pag-angkat sang mga produkto halin sa iban nga pungsod, nga posible makaapekto sa presyo sang mga imported goods. Apang, mahimo man nga makabenepisyo ang mga makabaton sang dollar remittances halin sa Estados Unidos, bangud mas daku ang katumbas nga kantidad sini kon ilisdan sa piso.
