KORONADAL CITY – Nagsentro sa pagpangamuyo kag pagpasalamat ang pagtililipon sang Muslim community sa South Cotabato kadungan sang selebrasyon sang Eid Al Adha o Feast of Sacrifice subong nga adlaw.
Ini ang ginpahayag ni Ginang Nancy Pangwa, isa sa mga elder sa Grand Mosque sa siyudad sang Koronadal sa interview sang Bombo Radyo Koronadal.
Suno kay Pangwa, importante ang adlaw nga ini bilang simbolo sang pagtakop sang isa ka bulan nga pilgrimage sa Mecca sang mga utod nila sa pagtuo.
Dugang pa sini, temprano pa nga nagsambayang sa mosque ang kadam-an sa mga Muslim kun diin ang iban naman sa mga open field.
Kadungan sang selebrasyon subong nga adlaw nagpatigayon sila sang kanduli kag salo-salo agud pasalamatan si Allah nga nagpabilin nga bug-os ang ila tagsa ka pamilya.
Naghatag man sila sang bulig kag mga pagkaon para mga pigado kag nagakinahanglan.
kadungan man sang Eidl Adha ang pagpangamuyo nga mangin malinong kag madinalag-on ang selebrasyon indi lamang sa Mindanao kundi mangin sa bug-os nga pungsod.
