Ginabulubanta P15,000 ang kaperdihan nga naeksperyensyahan sang isa ka mangunguma sa Barangay Caloocan, Koronadal City bangud sa epekto sang El Niño.
Sa interview sang Bombo Radyo Koronadal kay Evangelista Solinap, iya ginpahayag nga dako ang epekto sang sobra nga kainit sa iya mga pananom nga utanon, lakip na ang sili, kalabasa kag pipino.
Suno kay Solinap, mabudlay para sa ila ang pagsalig sa irrigation ukon patubig bangud nagakinahanglan ini sang gasolina, ilabi na nga nagasaka naman liwat ang presyo sang gatong.
Bangud sini, napilitan sila nga magsalig na lamang sa ulan, nga indi man makasustiner bangud sang tuman nga kainit.
Ginpahayag ni Solinap nga bangud sa epekto sang El Niño, wala nila nabawi ang kapital nga ila gin-gasto sa pagpananom kag ginakabig niya nga total failure ang ila sini nga pananum.
Dugang pa niya, dako ang kabudlayan nga ila gin-atubang bilang mga mangunguma bangud indi lamang ang ani ang apektado kundi lakip ang ila pang-adlaw-adlaw nga pangabuhi.
