Iginiit ng mga dating Punong Mahistrado ng Supreme Court na sina Artemio Panganiban, Hilario Davide, at Reynato Puno na ang voting threshold para sa conviction sa impeachment trial ni Vice President Sara Duterte ay dapat ibatay sa bilang ng mga senador-hukom na aktibong lumahok sa paglilitis.
Inilahad nila ito noong Miyerkules, sa Day 26 ng impeachment trial, bilang amici curiae na inimbitahang magbigay ng kanilang ekspertong opinyon tungkol sa tamang voting threshold para sa conviction.
Ayon kay Panganiban, mahalaga ang aktibong pakikilahok at independiyenteng pagsusuri sa mga ebidensya upang makagawa ang Senado ng patas at responsableng desisyon.
Samantala, sinabi ni Davide na hindi dapat awtomatikong isama sa pagkuwenta ng two-thirds ang mga senador na hindi makaganap ng kanilang tungkulin dahil sa detention, legal na hadlang, o iba pang diskwalipikasyon. Aniya, dapat ibatay ang bilang sa mga senador na kwalipikadong bumoto.
Sumang-ayon si Puno at sinabi niyang hindi dapat literal lamang na bigyang-kahulugan ang probisyong “two-thirds of all the Members of the Senate.” Aniya, dapat ding isaalang-alang ang sitwasyon ng mga senador at ang layunin ng Konstitusyon.
May ibang pananaw naman si dating SC Associate Justice Adolfo Azcuna, isa sa mga framers ng 1987 Constitution. Ayon sa kanya, 16 na boto ang kinakailangan para sa conviction dahil ang two-thirds requirement ay nakabatay sa kabuuang membership ng Senado.
Dagdag ni Azcuna, ang requirement na ito ay hindi lamang isang technicality kundi nagsisilbing pananggalang upang hindi maging karaniwang instrumento ng partisan politics ang impeachment.
