Ginpanawagan sang grupo nga Sambayanan ang pag-resign ni President Ferdinand Marcos Jr., bangud sa ila pagpati nga wala na ini sang nagakaigo nga kapasidad sa pagsolbar sang nagapadayon nga mga problema sang pungsod.
Sa interview sang Bombo Radyo Koronadal, ginpahayag ni General Secretary Jeffrey “Ka Eric” Celiz, sang Sambayanan, nga ginakabig nila ang administrasyon ni Marcos Jr. bilang pinaka-ugat sang mga isyu sa korapsyon, kinagamo sa pulitika kag ekonomiya.
Suno sa iya, amo ini ang kabangdanan nga nagakadula ang pagsalig kag paglaum sang publiko sa liderato sang presidente.
Ginpahayag man ni Celiz nga ang ginpatigayon nga peace rally sang Iglesia ni Cristo nagapakita nga nagadamo ang nagapanawagan sang pagbag-o sa liderato sang pungsod, lakip na ang panawagan nga mag-resign si Marcos Jr.
Samtang, gin-awhag niya si Vice President Sara Duterte nga mangin handa sa bisan ano nga mahimo matabo sa sitwasyon, bangud posible nga siya ang magsalo sang pagka-presidente kon magdesisyon si Marcos Jr. nga magpanaog sa puwesto bangud sa nagatubo nga pressure batok sa iya.
