-- ADVERTISEMENT --
Ginpakanubo lang sang Russia ang pamahog ni US President Donald Trump nga dapat magtuman na sila sa ceasefire deal sa Ukraine.
Sa iya pagbisita sa Scotland, ginsiling ni Trump nga dapat sa sulod sang 10 ka adlaw magpahayag na ang Russia sang pag-uyon sa ginapasulundan sang US nga ceasefire.
Ang amo nga pamahog ang ginpadali humalin sa una nga 50 ka adlaw nga ginhatag sa Russia; kag kon indi sila mag-uyon, ipaidalom sila sa mabug-at nga taripa.
Ginklaro naman sang Russia nga tubtob wala nasunod ang ila mga kondisyon, indi sila magatuman sa deadline nga ginpahayag ni Trump.
Madumduman nga makapila ka beses na ang pag-istoryahanay sang duha ka panig, apang wala gihapon ini naglab-ot sa kasugtan.
