Ginalauman sang mga kunsumidor ang panibag-o nga hugnat sang rollback sa presyo sang liquefied petroleum gas (LPG) sini nga semana, nga ginapatihan magahatag sang gamay nga kahupayan sa ila adlaw-adlaw nga gasto.
Sa advisory, ginpahayag sang LPG supplier nga Solane nga magapatuman sila sang pagnubo nga P3.36 kada kilo, dala na ang value-added tax (VAT), nga mangin epektibo alas-6 sang aga sang Abril 21, 2026.
Katumbas ini sang P33 nga pagbuhin sa kada 11 ka kilo nga LPG tank, suno sa LPG Marketers Association, nga isa sa ginabakal sang kadam-an nga panimalay para sa pagluto.
Suno sa founder sang grupo nga si Arnel Ty, ang pagnubo sang presyo sang LPG ginbangdan sang pagpanubo man sang shipping kag transport costs sa nagligad nga mga semana, nga nagresulta sa mas manubo nga presyo sa merkado.
Ginpahayag man nga ini nga rollback ginapaabot sang madamo nga konsumidor bangud sa padayon nga pagsaka sang iban pa nga mga balaklon, kag nagahatag sang gamay nga bulig sa pagpasanyog sang ila budget sa panimalay.
