Ginpabutyag ni Governor Reynaldo Tamayo Jr. nga preparado ang probinsya sang South Cotabato sa posible nga paglala sang El Niño ukon ginatawag nga “Super El Niño.”
Suno sa gobernador, bisan wala pa sang ginpagwa nga opisyal nga pagpaandam ang PAG-ASA nahanungod sa amo nga sitwasyon, nagpreparar na ang probinsyal nga gobyerno bilang pagpaabot sa posible nga epekto sini.
Kabahin sa mga preparasyon ang water trucks, impounding facilities kag bastante nga suplay sang tubig sa mga watershed.
May yara man sang buffer stock agod masiguro ang suplay sang kinahanglanon nga tubig kon magdugay ang tig-ilinit.
Ginpahayag man ni Tamayo nga may yara sang igo nga pondo ang probinsya kag mga food packs nga natalana ipanghatag sa mga residente nga posible maapektuhan sang mabaskog nga El Niño.
Nagpanawagan man ang gobernador sa publiko nga mangin preparado kag magpili sang mga tanom nga mas makasugakod sa init kag kakulang sang tubig bilang bahin sang pagpreparar sa posible nga epekto sang El Niño.
Sa karon, wala pa sang na-report nga mga mangunguma sa South Cotabato nga apektado sang amo nga kondisyon. Padayon naman nga ginamonitor sang probinsyal nga gobyerno ang sitwasyon, ilabi na ang posible nga epekto sini sa agrikultura kag suplay sang tubig.
