Ginpahayag ni Lead Prosecutor Atty. Gerville Luistro sa opening remarks sang una nga adlaw sang impeachment trial ni Vice President Sara Duterte nga gin-abuso sang Bise Presidente ang tiwala kag gahum nga ginhatag sa iya sang katawhan, gani kinahanglan siya mag-atubang sang panabat.
Suno kay Luistro, ang impeachment trial nagatuyo nga mapakita ang accountability sa paggamit sang pondo kag gahum sang gobyerno, kag indi ini kabahin sang pulitika ukon personal nga paghimalos.
Kaangot sini, madumduman nga nauna na nga ginpahayag ni Atty. Luke Espiritu, Labor Lawyer, sa interview sang Bombo Radyo nga dako ang pagsalig niya sa kampo sang prosecution panel nga organisado kag maalam nila nga atubangon ang impeachment trial ni Vice President Sara Duterte, bitbit ang mga mabug-at nga mga ebidensya batok sa iya.
Samtang, ginpaambit man ni Luistro ang prinsipyo nga “Salus populi est suprema lex” ukon “The welfare of the people is the Supreme Law,” bilang giya sang prosekusyon sa kaso.
Ginpahayag niya nga igapresenta sang prosekusyon ang mga dokumento, government reports, testimonya sang mga saksi, kag iban pa nga ebidensya kaugnay sang apat ka Articles of Impeachment batok sa respondent.
