Ginapadasigan ni Senate President Win Gatchalian ang pagsabatas sang ginproponer nga GINHAWA agud mabuligan ang mga mamumugon nga mapabilin ang ila kapasidad sa pagbakal sang ila mga kinahanglanon bangud sa padayon nga pagsaka sang presyo sang petroloyo.
Suno kay Gatchalian, nagadugang ini nga kabudlayan sa mga konsumidor, ilabi na sa mga minimum wage earner, samtang nagapadayon ang tensyon sa Middle East nga mahimo magtulod pa sa pagsaka sang presyo sang krudo sa bilog nga kalibutan.
Dugang pa niya, indi lamang mga motorista ang direktang maapektuhan sang pagsaka sang presyo sang lana bangud mahimo man magsaka ang presyo sang iban nga basic commodities kag serbisyo, lakip ang kuryente, bangud sa mas mataas nga gasto sa enerhiya.
Sa Senate Bill No. 56 ukon Granting Increase in Take-Home Pay for All Working Filipinos Act nga ginatawag nga GINHAWA measure, ginaproponer ni Gatchalian nga ipasaka ang income tax exemption threshold halin P250,000 pakadto sa P400,000 nga tinuig nga kita.
Ginaproponer man nga ipasaka ang cap sa mga bonus nga wala ginapatawan sang buwis halin P90,000 pakadto sa P150,000.
Katuyuan sang mga pagbag-o nga ini nga madugangan ang take-home pay sang mga ordinaryo nga manugpangabudlay kag mabuligan sila sa pag-atubang sang nagataas nga presyo sang mga nagapanguna nga kinahanglanon.
