Pormal nang gin-untat sang House prosecution panel ang bribery charge batok kay Vice President Sara Duterte agud mapadasig ang impeachment trial.
Ini ang ginpamatud-an ni House prosecutor kag Manila Rep. Joel Chua. Suno kay Chua, napagdesisyunan na sang prosecution panel sang nagligad nga semana ang pag-atras sa Article III ukon bribery charge, kasunod man sang pagtangtang kay anay Sen. Antonio “Sonny” Trillanes IV bilang testigo.
Ginpahayag ni Chua nga nagapati ang prosekusyon nga bastante na ang ebidensya nga naiharap sa tatlo pa ka impeachment charges, gani indi na kinahanglan nga ipadayon ang bribery case.
Suno sa iya, kabahin sang katuyuan sang amo nga tikang ang paglikaw nga maglapaw pa sa masunod nga tuig ang impeachment trial kag masiguro nga matapos ini sa sulod sang tuig.
Padayon naman nga ipresentar sang prosekusyon ang mga testigo kag dokumento may kaangtanan sa Article II, lakip na ang mga alegasyon sang unexplained wealth batok kay Duterte.
Ginpanubag man ni Chua nga indi indikasyon sang kakulangan sa ebidensya ang pag-atras sa bribery charge, kundi kabahin ini sang estratehiya sang prosekusyon agud mapadasig ang paglilitis.
Ginalauman nga magpagwa naman sang opisyal nga pahayag buwas si Lead Prosecutor Rep. Gerville Luistro may kaangtanan sa pag-drop sang bribery case.
