Ginpaandaman ni Atty. Benjamin Tolosa Jr. nga indi dapat pabay-an ang mga alegasyon ni anay Sen. Antonio “Sonny” Trillanes IV, bangud “very serious” ini, suno sa prosecution counsel kag legal spokesperson.
Suno kay Atty. Tolosa, usisaon sang House prosecution panel ang mga pahayag ni Trillanes kag ipaanggid sa mga opisyal nga dokumento nga ipresentar sang masunod nga mga testigo sa impeachment trial ni Vice President Sara Duterte.
Bisan indi direkta nga magamit sa paglitiga ang mga pahayag ni Trillanes bangud ginhimo ini sa guwa sang korte, ginpahayag ni Atty. Tolosa nga indi dapat ini pagbalewalaon bangud sa kabug-aton sang mga alegasyon.
Lakip sa ginmentionar ni Trillanes ang sobra P300 milyon nga gin-akusahan nga nag-agi halin sa mga kompanya nga nakabase sa China pakadto sa kompanya nga ginapanag-iyahan ni Atty. Manases “Mans” Carpio; sobra P100 milyon sa bank accounts nanday Duterte kag Carpio; kag isa ka P80-milyon nga cash transaction sa sulod sang isa lamang ka adlaw.
Samtang, magatestigo sa Lunes si Anti-Money Laundering Council Executive Director Atty. Ronel Buenaventura, nga magatalakay sa mga transaksyon sa bank accounts sang mag-asawang Duterte-Carpio.
Masunod sa iya ang mga representante sang mga bangko kag insurance companies nga nagauyat sang accounts ukon financial instruments sang mag-asawa, antes magtestigo ang isa ka opisyal sang Bureau of Internal Revenue bahin sa ila income net of taxes.
