Ginapaandaman sang Philippine Consulate General sa Los Angeles ang komunidad sang mga Pilipino sa Southern California bangud sa delikado kag malawig nga heat wave nga nagadala sang sobra kataas nga temperatura sa rehiyon.
Suno sa National Weather Service, nagpagwa na ini sang Extreme Heat Warning para sa daku nga bahin sang Los Angeles kag Orange County, kun sa diin posible maglab-ot sa 102 tubtob 107 degrees Fahrenheit ang temperatura sa pila ka lugar sini nga weekend.
Bangud sini, ginlaygayan sang konsulado ang mga Pilipino nga mag-inom sang bastante nga tubig, limitahan ang mga outdoor activity, kag magpabilin sa mabugnaw ukon air-conditioned nga lugar agud malikawan ang mga balatian nga tuga sang sobra nga kainit.
Mahimo magkadto sa mga residente nga wala sang aircon sa ila puluy-an sa mga pampubliko nga pasilidad pareho sang mga library kag senior center, ukon magtawag sa 311 agod mahibaluan ang pinakamalapit nga cooling facility.
Hugot man nga ginapaandaman sang mga awtoridad ang publiko nga indi ibilin ang mga kabataan, mga tigulang kag mga sapat sa sulod sang naparada nga salakyan, bangud madasig ang pagsaka sang temperatura sa sulod sini kag mahimo ini magresulta sa kamatayon.
