Wala sang suspension sang klase sa Koronadal City sa Oktubre 5, kasunod sang pagpagwa sang official statement ni City Mayor Erlinda P. Araquil.
Suno sa alkalde, magapadayon ang regular nga klase sa Lunes, Oktubre 5, bisan pa nga ginasaulog sa amo nga adlaw ang National Teachers’ Day kag World Teachers’ Day.
Ginpahayag ni Araquil nga ginbase ang desisyon sa Section 7 sang DepEd Memorandum No. 051, series of 2026, nga nagahatag sang giya para sa selebrasyon sang World Teachers’ Day.
Suno sa memorandum, ang mga aktibidad para sa selebrasyon indi dapat makabalda sa instructional time kag ginadasig ang mga buluthuan nga magpatigayon sang angay nga school-based activities.
Ginpahayag sang City Government of Koronadal nga importante nga maproteheran ang oras sang pagpanudlo agud makapadayon ang mga estudyante sa ila pagtuon, samtang ginapasidunggan man ang mga manunudlo paagi sa makahulugan nga mga aktibidad.
Ginpaabot naman ni Mayor Araquil ang iya pagpasalamat kag pagkilala sa dedikasyon, pasensya kag sakripisyo sang mga manunudlo sa pag-atipan kag pag-edukar sa mga kabataan.
Suno sa iya, ang kontribusyon sang mga teachers indi lamang nagaabot sa sulod sang classroom kundi nagabulig man sa pagpalig-on sang pamilya, komunidad kag palaabuton sang Koronadal.
