Ginabalik sa proposed 2027 national budget ang P10 bilyon nga pondo para sa intervention program sang mga mangunguma kag manugpangisda.
Suno kay Senior Deputy Speaker Ferdinand Hernandez, ginpaproponer ni House Speaker Faustino “Bojie” Dy III ang pagbalik sang pondo matapos ini nga ginkakas sa orihinal nga budget proposal.
Ginpahayag ni Hernandez nga nalakip na sa proposed amendments sang House ang restoration sang P10 bilyon nga pondo.
Sang 2026 budget, P10 bilyon man ang gin-alokar para sa intervention program sang mga mangunguma kag manugpangisda.
Samtang, ginpahayag ni Dy nga padayon nga pamatian sang Kongreso ang mga pangabay sang sektor sang agrikultura kag panikasugan nga mapalig-on ang mga kasuguan para sa ila suporta kag proteksyon.
Ini ang iya ginpahayag sa ikalima nga leg sang LegisHear sa Victorias City, Negros Occidental, kun sa diin ginpatuhoy man ang diskusyon sa agrikultura kag industriya sang asukal.
