Gina-usisa kag ginabalanse na sang isa ka mangunguma sa Syudad sang Koronadal ang iya mga galastuhan sa kaumahan bilang preparasyon sa posible nga epekto sang palaabuton nga Super El Niño.
Sa interview sang Bombo Radyo Koronadal kay Tatay Romeo, isa ka mangunguma sa syudad, iya ginpahayag nga base sa iya naani sang nagligad nga bulan, wala siya nakaeksperyensya sang dako nga kadulaan bangud may nabilin pa siya nga kinitaan halin sa pagbaligya sang iya mga produkto.
Suno kay Romeo, importante nga tutukan sang mga mangunguma ang kahimtangan sang panahon antes magtanum, ilabi na sa posibilidad sang tuman nga kainit nga mahimo makaapekto sa suplay sang tubig para sa irigasyon.
Gani, isa sa iya ginapatigayon nga preparasyon amo ang pag-usisa kag pagbalanse sang mga galastuhan sa kaumahan, agud mangin handa sa posibilidad nga magkulang ukon mauntat ang suplay sang tubig nga kinahanglan sang iya mga pananum.
Dugang pa niya, nakabaton man siya sang abuno halin sa Department of Agriculture (DA), nga dugang nga bulig sa pag-atipan sang iya mga pananum sa tunga sang posible nga epekto sang Super El Niño.
Paathag ni Romeo, kinahanglan nga mangin maampingon ang mga mangunguma sa pagplano sang ila pagpanguma agud maminusan ang posible nga kadulaan kag mapadayon ang ila pangabuhian bisan pa sa pagbag-o sang kahimtangan sang panahon.
