Ginalantaw sang isa ka propesor nga dako ang posibilidad nga ma-acquit si VP Sara Duterte sa nagapadayon nga impeachment proceedings batok sa iya bangud sang pagbag-o sa mayorya sang Senado.
Sa exclusive interview sang Bombo Radyo Koronadal kay Prof. Danilo Arao, propesor sang Department of Journalism sang University of the Philippines Diliman, iya ginpahayag nga mahimo nga makaapekto ang pagbag-o sang liderato sa Senado sa direksyon kag resulta sang impeachment trial batok sa Bise Presidente.
Suno kay Arao, siyam (9) lang ka boto halin sa mga senador ang kinahanglan agud ma-acquit ang kaso.
Sa subong nga sitwasyon, iya ginlantaw nga may advantage ang kampo ni Duterte, apang posible pa ini nga magbag-o bangud kinahanglan man konsiderahon sang mga senador ang ila political survival, ilabi na nga nagahilapit ang 2028 elections.
Ginpahanumdom man ni Arao ang publiko nga mangin maalam kag responsable sa pagbaton sang impormasyon nga ila mabatian ukon mabasa sa social media.
Ginpanawagan niya ang padayon nga pagbantay sang publiko sa mga posible nga development kag pagbag-o sa dalagan sang impeachmentproceedings.
Madumduman nga nag-convene na ang Senado bilang impeachment court sang Lunes, Mayo 18, 2026, kun sa diin nagpanumpa na bilang senator-judges ang mga senador kag si Senate President Alan Peter Cayetan bilang presiding officer para sa pormal nga pag-umpisa sang impeachment trial batok kay Vice President Duterte.
