KORONADAL CITY – Yara na sa kustodiya sang kapulisan ang pito ka mga kalalakihan nga nadakpan sa akto nga nagapangawat sang pinya sa Crossing 2, Barangay Reyes, Banga, South Cotabato.
Ini ang ginkumpirmar ni Police Lt. Col. Emerson Policarpio sa interview sang Bombo Radyo Koronadal.
Ginkilala ni PLtCol. Policarpio ang pito ka mga suspek nga sanday Aliamer Balawag, 33-anyos;Umbra Tuluganan,22, Muktar Abtet, 19-anyos;Pahat Marato, 24-anyos; Muhameiden Akmad, 22-anyos; Saidamin Tuluganan, 23-anyos; Faisal Acob, 45-anyos nga lunsay mga residente sang SK Pendaton, Maguindanao.
Suno kay PLt.Col. Policarpio, nadakpan sa akto sang roving guard sang Dole Philippines ang pito nga nagapanguha sang pinya kag ginkarga sa ila mga motorsiko.
Naglab-ot sa 1,133 kabilog ang nakumpiskar sa mg aini nga lunsay MG3 Variety kag nagalab-ot sa P49,852 ang kantidad.
Magluwas sa mga pinya, narekober man sa mga suspek ang pito ka motorsiklo sang mga ini nga may nakakabit pa nga basket nga ginpangbutangan sang pinya.
Sa karon, ginapreparar na sang Banga PNP ang kaso nga ipasaka batuk sa mga nadakpan.
