May katungod ang mga Pinoy seafarers nga magbalibad sa pagbiyahe ukon paglabay sa mga lugar nga ginakabig nga war-like zone, kasubong sang Strait of Hormuz nga isa ka high-risk nga ruta sang mga barko.
Ini ang pagpaathag ni Capt. Vianne De Vicente, Bombo International News Correspondent to Strait of Hormuz, sa interview sang Bombo Radyo Koronadal.
Suno kay Capt. De Vicente, ini ang kabahin sang mga tikang para maproteheran ang mga Filipino seafarers sa tunga sang mga peligro sa amo nga lugar.
Ginpahayag niya nga ang amo nga proteksyon nagasunod sa ginpaguwa nga impormasyon sang Department of Migrant Workers ukon DMW.
Suno sa iya, indi dapat pugson ang mga seafarers nga magbiyahe sa mga lugar nga may dako nga risgo sa seguridad.
Apang kun kinahanglan nga maglabay sa high-risk areas, responsibilidad sang kapitan sang barko nga ipahibalo sa mga crew ang kahimtangan kag mga peligro sa ruta.
Kinahanglan man nga maathag sa mga crew ang mga safety measures nga dapat sundon antes magpadayon sa pagbiyahe.
