KORONADAL CITY – Nagapanawagan sa publiko ang Barangay Local Government Unit sang San Roque, siyudad sang Koronadal agud Nga madakpan ang lalaki nga gina-alegar nga nanghurikap sa isa ka menor de edad, pasado alas 10 sang aga, Nobyembre 5,2025.
Sa exclusive interview sang Bombo Radyo kay Kagawad Jovenyl S. Arcabal, ginpahayag sini nga nagpadulong sa Barangay Hall ang pamilya sang biktima kag gin-report ang indi maayo nga eksperiensiya sini matapos nga ginbastos sang isa ka lalaki nga nakamotorsiklo nga may tabon ang nawong.
Gilayon nga gin-checkyar ang mga CCTV nga nakabutang malapit sa lugar sa diin ginhimo sang suspek ang pagpangbastos kag didto nakit-an ang isa ka lalaki nga nakasuksok sang pink nga T-shirt, pula nga shorts, kag may tabon ang iya nawong, samtang nagasakay sa isa ka XTZ motorcycle nga wala sang plaka.
Bangud sini, magahatag sang ₱20,000 nga padya si Kapitan Marvin “Yanyan” Gumbao sa makatudlo ukon makahatag impormasyon angot sa suspek.
Kadungan sini, ginapanawagan sang Barangay San Roque sa tanan nga kung kilala nila ang nasambit nga persona, ipalab-ot gilayon sa Barangay San Roque ukon sa mga otoridad ang impormasyon.
