Nagpahayag si Senador Ronald “Bato” dela Rosa nga isa sa mga rason kun ngaa nagbalik siya sa publiko kag nagtupa liwat sa iya trabaho sa Senado amo ang kahuya nga iya nabatyagan bangud sa mga pamuna sang katawhan.
Suno kay dela Rosa, madamo sang importante nga mga isyu sa Senado nga nagakinahanglan sang iya presensya, lakip na ang pagbag-o sa liderato sang Senado kag ang posible nga pagpungko sini bilang impeachment court kun mapadala ang articles of impeachment.
Ginsiling man sang senador nga naapektuhan siya sa mga komentaryo sang publiko nga nagaangkon nga nagabaton siya sang sweldo bisan wala nagatupa sa trabaho ukon nagapakita sa publiko.
Ginpat-od niya nga indi niya kinaandan ang magbaton sang bayad nga wala sang katumbas nga serbisyo, gani nagdesisyon siya nga magbalik sa trabaho.
Nadula sa publiko si dela Rosa sulod sang anum ka bulan matapos ginpahayag ni Crispin Jesus Remulla nga may warrant of arrest ang International Criminal Court batok sa iya may kaangtanan sa maduguon nga kampanya kontra iligal nga droga sang administrasyon ni anay Presidente Rodrigo Duterte.
Si dela Rosa ang nagsilbi bilang hepe sang Philippine National Police sa tunga sang drug war campaign sang nagligad nga administrasyon.
Sa ulihi, ginpamatud-an man sang ICC nga may ginpagwa gid man nga warrant of arrest batok sa senador sang Nobyembre 6, 2025.
Ginaako man ni dela Rosa nga nagtago siya matapos makabaton sang impormasyon parte sa warrant bangud nagaalang-alang siya para sa iya personal nga kahilwayan.
Subong, yara siya sa idalom sang “protective custody” sang Senado samtang ginahulat ang desisyon sang Supreme Court of the Philippines may kaangtanan sa mga petisyon nga ila ginpasaka.
