KORONADAL CITY – Nagapadayon ang imbestigasyon sang mga awtoridad sa madugo nga insidente sang pagpamuno nga nagluntad sa Purok 4, Barangay Centrala, Surallah, South Cotabato, Huwebes sang udto, Mayo 7,2026.
Sa interview sang Bombo Radyo Koronadal kay Barangay Chairman Oscar Bubongan sang Barangay Centrala, ginpahayag sini nga pasado alas-12:15 sang udto sang nakabaton sila sang impormasyon tuhoy sa nagakahanabo nga kinagamo sa panimalay sang pamilya Dela Cruz.
Ang biktima ang isa ka seafarer nga ginkilala kay Alyas Ryan, 40-anyos, bana sang isa ka myembro sang Philippine National Police nga ginbuno sa tuo nga bahin sang iya dughan sang suspek nga ginkilala kay Alias Eboy.
Base sa inisyal nga imbestigasyon, nagsulod ang suspek sa balay sang biktima samtang yara sa idalom sang impluwensya sang makahulubog nga ilimnon kag ginapangita ang iya asawa. Sang nagsabat ang biktima nga wala sia sang ihibalo kon diin ang asawa sini, hinali lang sia nga ginbuno sang suspek sa atubangan sang iya duha ka menor de edad nga mga bata.
Sa pag-abot sang mga nagresponder nga pulis, sa baylo nga magsunod, nangin mas bayolente pa ang suspek kag nagbato nga nagresulta sa pagkapilas sang duha ka pulis.
Bangud sa aktuwal nga peligro sa kabuhi sang mga pulis napilitan ang mga otoridad nga tiruhon ang suspek kun diin naigo ini sa iya wala nga kilay.
Sa karon, ginabulong na sa isa ka pribado nga hospital ang biktima, samtang gindala naman sa SOCCSKSARGEN Hospital ang suspek nga nagapangatubang na subong sang patong-patong nga kaso.
Narekober sa crime scene ang duha ka kutsilyo kag mga cartridge cases sang caliber 9mm nga ipaidalom sa ballistic examination.
Kaangot sini, nagpanawagan si Kapitan Bubongan sa iya mga nasakupan nga magpabilin nga kalmado kag gilayon nga magreport sa barangay ukon kapulisan kon may makit-an nga kaduda-duda nga hulag sa ila palibot agud malikawan ang kaangay sini nga mga trahedya.
