Ginpahayag ni anay senador Antonio Trillanes IV nga posible nga si Senador Bong Go ang masunod nga maisyuhan sang warrant of arrest sang International Criminal Court kasunod sang kaso ni Senador Ronald “Bato” dela Rosa.
Suno kay Trillanes, may impormasyon siya nga may nagaabot nga warrant batok kay Go may kaangtanan sa mga alegasyon sang crimes against humanity, murder kag attempted murder.
Gindugang pa niya nga posible nga maglawig pa sang pila ka bulan antes maguwa ang warrant bangud nagaagi pa ini sa proseso sang ICC.
Gin-angot man ni Trillanes si Go sa gin-alegar nga mga insidente sang extrajudicial killings sa panahon sang administrasyon ni anay Presidente Rodrigo Duterte.
Suno pa sa anay senador, ginreklamo si Go sa ICC bangud sang alegasyon nga sa tunga sang kampanya kontra droga kag mga extrajudicial killings, siya kuno ang nagahatag sang reward sa kada assassination bilang lider sang ginatawag nga special operation group sang “National Death Squad” ni Duterte.
Bukod kay Go, ginsiling man ni Trillanes nga posible man nga maisyuhan sang ICC warrant si anay hepe sang Philippine National Police nga si Oscar Albayalde.
