Gin-report sang Bureau of Internal Revenue (BIR) nga nakakumpiskar na ini sang mga sigarilyo kag vape products nga nagalab-ot sa P7.2 billion ang tax liabilities halin sang Enero tubtub Hunyo subong nga tuig.
Suno kay BIR Commissioner Romeo Lumagui, nagdangat na sa masobra 500,000 packs sang sigarilyo kag masobra 170,000 ka vape products ang nakumpiskar sang revenue agency sa amo nga period.
Suno kay Lumagui, indi lang retail ang ila gina-monitor kaangot sa kampanya batok sa illicit cigarettes and vapes kundi mangin ang warehouses kag dalagku nga sellers.
May ginapaguwa man ang ahensya nga mga regulasyon agud nga mag-tutok sa manufacturers kag sellers sang sigarilyo.
Iga-implementar man sang bureau ang mandatory tax stamps sa tanan nga imported kag locally manufactured nga vape products.
Paagi man ini sang ahensya agud ma-check kun mabayaran ang husto nga excise taxes.
Pananglitan indi mabayaran ini nga buwis, kumpiskaron ang vape products kag posible pa mangatubang ang negosyo sang criminal liabilities.
Sa vape pa lamang, ginabanta nga at least P5 billion na sa revenues ang napierde sa gobyerno bangud sa smuggling kag illegal selling sang amo nga produkto.
