Pinagpapaliwanag ni House Private Prosecutor Atty. Lorna Kapunan si Vice President Sara Duterte tungkol sa pinagmulan ng personal na pondong ginamit nito sa pagbiyahe sa Hong Kong nitong Nobyembre 6 hanggang 8.
Kasunod ito ng pahayag ng Office of the Vice President (OVP) na sariling pera ng Bise Presidente ang gagamitin sa naturang biyahe at walang gagamiting pondo mula sa gobyerno.
Para kay Kapunan, hindi sapat na sabihing personal na pera ang ginastos sa biyahe. Aniya, dapat ding maipaliwanag kung paano natutustusan ng suweldo ng isang Bise Presidente ang madalas na paglalakbay sa ibang bansa gamit ang sariling kakayahang pinansyal.
Binigyang-diin din ng abogado na dapat nakaangkla sa mga dokumentong inihain sa impeachment court ang magiging paliwanag ni Duterte, lalo na sa usapin ng mga alegasyon ng hindi maipaliwanag na yaman.
Bukod dito, pinuna ni Kapunan ang umano’y kawalan ng kahandaan ng Bise Presidente na direktang harapin at sagutin ang mga paratang laban sa kanya.
Nananatiling bahagi ng usapin ang pinagmulan ng mga pondong ginagamit ni Duterte sa kanyang mga gastusin, na kabilang sa mga isyung binibigyang-pansin sa impeachment proceedings.
