Nagapanawagan ang pila ka senador kay Presidente Ferdinand Marcos Jr. nga ideklara ang State of Calamity ukon State of Imminent Disaster sa mga lugar nga apektado kag posible nga maigo sang El Niño.
Paagi sa Senate Resolution No. 765, ginaduso sang mga senador ang mas madasig nga pagpaguwa kag paggamit sang pondo halin sa 2026 General Appropriations Act agud mangin handa ang gobyerno sa posible nga epekto sang malawig nga tag-ilinit.
Lakip sa mga ginapanawagan nga tikang ang pagpatuman sang price control, pagpugong sa hoarding kag profiteering, pagpaayo sang mga pampubliko nga pasilidad kag paghatag sang pinansyal nga bulig sa mga sektor nga maapektuhan.
Ginpunto man sa resolusyon ang importansya sang pagpanalipod sa pangabuhian kag kaayuhan sang mga pumuluyo, ilabi na ang mga mangunguma kag komunidad nga posible mag-atubang sang kakulang sang tubig kag dako nga epekto sang tag-ilinit.
