Ginpanginwala ni Barangay Captain Benhur P. Peñol sang Brgy. New Iloilo, Tantangan, South Cotabato ang alegasyon nga siya mismo ang nagpanumbag sa isa ka residente nga ginakilala sa alyas nga Joel, nga may kaangtanan sa reklamo nahanungod sa water system sang barangay.
Sa interview sang Bombo Radyo Koronadal, ginpaathag ni Kapi. Peñol nga ang iya bata, kag indi siya, ang nagsumbag kay alyas Joel matapos ini suno pa nagapalapta sang mga impormasyon batok sa iya nga nakapakahuya sa iya pangalan bilang kapitan sa atubangan sang madamo nga tawo.
Suno sa kapitan, wala na nakapugong ang iya bata sa iya kaakig rason nga natabo ang insidente.
Samtang, ginpahayag ni Kap. Peñol nga ginatinguhaan sang barangay council nga masolusyunan ang problema sa water system nga amo ang ginareklamo sang residente.
Kaangot sini, nagapanawagan ang kapitan sa mga pumuluyo nga kun may mga reklamo ukon concern sa iya pagserbisyo kag mga proyekto sang barangay, direkta ini nga ipabutyag sa husto nga tion kag lugar agud maatubang kag masolusyunan, sa baylo nga magpalapta sang mga impormasyon nga mahimo makahalit sa iya dungog.
