Nag-abot ang bulig halin sa nagkalain-lain nga ahensya sang gobyerno kag organisasyon para sa kapin 170 ka indibidwal nga naapektuhan sang pagbaha sa Barangay Morales, Syudad sang Koronadal.
Ini ang ginpabutyag ni Barangay Captain Dimson Floro sa interview sang Bombo Radyo Koronadal, kun sa diin ginpasalamatan sini ang lokal nga panguluhan sang syudad sa madasig nga pagresponde sa tion sang kalamidad.
Suno kay Floro, personal nga nagbulig ang alkalde sang Koronadal, kaupod ang City Engineering Office, sa pag-atipan sa mga residente nga naapektuhan sang mabaskog nga ulan, ilabi na sa 11 ka pamilya nga temporaryo nga nag-evacuate sa Barangay Morales Gymnasium.
Ginpahayag man sini nga ang mga evacuee ginhatagan sang pagkaon, katuluganan kag hygiene kits nga ginpondo halin sa barangay funds agud masiguro ang ila kinahanglanon samtang yara sila sa evacuation center.
Naghatag man sang dugang nga bulig ang Philippine Red Cross–South Cotabato Chapter paagi sa pagpanagtag sang hot meals kag hygiene kits para sa tagsa ka evacuee.
Dugang pa ni Floro, duha ka adlaw matapos ang pagbaha, nagpadangat man sang relief goods ang City Government paagi sa Department of Social Welfare and Development ukon DSWD.
Ginabulubanta nga 170 ukon masobra pa ka mga indibidwal nga naapektuhan sang pagbaha ang nakabaton sang relief packs.
