May positibo nga pagbag-o sa kahimtangan sang aktres nga si Jorrybell Agoto bisan padayon pa ini nga ginabulong sa Critical Care Unit (CCU).
Suno sa iya utod nga si Jed Agoto, padayon nga naka-sedate ang aktres, apang nakita na sang mga doktor ang amat amat nga pag-uswag sang iya vital signs.
Ginbantayan man sang medical team ang oxygen support sang iya ventilator agud mahanas liwat ang iya pagginhawa nga wala sang bulig sang makina.
Nahibaluan nga gindangat sa ospital si Jorrybell sang Setyembre 23 bangod sa lymphoma, isa ka sahi sang kanser, nga nagresulta sa komplikasyon lakip na ang pagtigom sang tubig sa iya baga kag kabudlayan sa pagginhawa.
Naka-tracheostomy man siya gani indi pa makaistorya sa iya pamilya.
Samtang, nagapadayon ang pamilya sa pagpangayo sang bulig para sa adlaw-adlaw nga kinahanglanon kag nagadako nga balaydan sa balay-bululngan.
Nagapangamuyo ang iya pamilya kag mga supporter nga magpadayon ang positibo nga pag-uswag sang iya kahimtangan kag makabalik siya sa maayo nga panglawas.
