Ginapaabot sang City Government of Koronadal nga mapuno na sang mga negosyante ang bag-o nga public market sa Enero 2027, samtang ginapadayon ang kampanya sa paglimpyo sang mga dalan kag pagpaayo sang streetlights.
Sa interview sang Bombo Radyo Koronadal ginpahayag ni Mayor Erlinda “Bing” Araquil, nga madamo na ang nag-apply para sa pwesto sa bag-o nga merkado, apang may pila pa ka building nga wala masudlan bangud ginakumpleto pa ang business permits kag iban nga kinahanglanon.
Samtang, ginapadayon man sang LGU ang pagpatuman sang nagakaigo nga pwesto para sa ambulant vendors kag pagpahalin sa mga nagabaligya sa indi gintalana nga lugar agud mapauswag ang kaayusan kag kalimpyo sang mga dalan.
Isa pa sa ginatutukan sang administrasyon amo ang pagpaayo sang streetlights bangud may mga solar-powered nga suga nga nagahatag sang maluya nga kasanag kon kulang ang init sang adlaw.
Gani, ginatalakay upod sa City Engineering Office ang posibilidad sang paggamit liwat sang regular nga kuryente paagi sa koordinasyon sa SOCOTECO.
Dugang pa ni Araquil, ginahanda man ang Christmas decoration competition kag ginapangabay ang mga dalagko-an nga mga malls dire sa syudad nga magpartisipar sa pagdekorar sang ila mga establisyimento bilang kabahin sang Christmas Festival sang siyudad.
